Mae’r ysgol yn awyddus i benodi athro/athrawes brwdfrydig i swydd o fewn yr Adran TGCh (Cytundeb Blwyddyn). Byddai’n ddymunol petai’r ymgeisydd llwyddiannus yn abl i gynnig ail bwnc i gwricwlwm yr ysgol, a’i nodi fel rhan o’ch cais am y swydd hon.    

Mae’r adran yn llwyddiannus a blaengar ar draws yr ysgol gan edrych ymlaen i ymestyn ymhellach ar ein darpariaeth wrth i’n harbenigedd fel ysgol gynyddu drwy’r penodiad hwn. Ymhellach mae’r ysgol wedi buddsoddi’n sylweddol mewn caledwedd TGCh a hynny er mwyn uwchraddio’r ddarpariaeth i staff a disgyblion. Mae taith yr ysgol yn y maes hwn, o ran hyder ac awydd staff i ymgymryd â mwy o dechnoleg i hybu addysgu yn amlwg iawn, ac yn hyn o beth edrychwn am ymgeisydd sy’n fodlon mentro a datblygu yn y maes gyda chefnogaeth gadarn yr adran.

Yn ogystal mae’r adran yn frwd iawn i roi profiadau i ddisgyblion o Dechnoleg Ddigidol mewn cyd-destun allgyrsiol. Mae’r adran yn cynnig amrywiaeth eang o brofiadau a chlybiau allgyrsiol a byddai disgwyl i’r ymgeisydd llwyddianus daflu ei hun yn egniol i’r gwaith yma, ac felly, mae sgiliau gwaith tîm yn allweddol.

Mae’r ysgol yn edrych ymlaen gyda brwdfrydedd i weld sut bydd gwersi y cyfnod clo yn gallu gwella ac addasu ein ffyrdd o ddarparu ac addysgu ein pobl ifanc i’r dyfodol. Mae hyn yn arbennig o wir wrth ystyried datblygiad Cwricwlwm i Gymru a’r modd mae’r Fframwaith Cymhwysedd Digidol yn gyfle arbennig i ddatblygu gwaith dysgwyr ac athrawon yn y blynyddoedd i ddod.

Os hoffech fwy o fanylion am y swydd hon ac am sgwrs anffurfiol cysylltwch â’r Pennaeth, Mr Matthew Evans.

Proses Ymgeisio

Gellid ymgeisio am y swydd hon drwy ffurflen a llythyr cais yn mynegi diddordeb am ymgymryd a’r swydd. Gellir sôn am brofiad perthnasol ar gyfer y swydd hon, ynghyd â’r weledigaeth ar sut y gellir cyfrannu ymhellach yng nghyd destun cymuned yr ysgol.

Dyddiad Cau: Hanner Dydd, Dydd Llun, Mawrth 4ydd

Dyddiad dechrau y swydd: Medi 1af 2024