Dirprwy Arweinydd y Ganolfan Adnoddau Arbenigol

Dirprwy Arweinydd y Ganolfan Adnoddau Arbenigol

(Anghenion dwys & Awtistiaeth)

CAD: 2b + ADY1

Mae’r ysgol yn awyddus i benodi Dirprwy Arweinydd y Ganolfan Adnoddau Arbenigol yn Ysgol Gyfun Gymraeg Glantaf. Dyma gyfle unigryw i ymuno ag Ysgol a Chanolfan lwyddiannus iawn o fewn ein Prifddinas sydd ag enw da o fewn ei chymuned ac sy’n gyson ei darpariaeth safonol cyfrwng Cymraeg i blant a phobl ifanc y dalgylch. Mae hon yn gyfle arbennig i ymuno a grŵp o staff prysur, brwdfrydig ac egnïol a gyda thîm ADY arbenigol ardderchog sy’n gweithio’n galed i sicrhau’r gefnogaeth orau i ddisgyblion a chymuned yr ysgol. Mae buddsoddiad sylweddol ar y gweill i drawsnewid ein darpariaeth a gwahoddwn unigolion egniol sydd â gweledigaeth gref am addysg gynhwysol i ymuno â ni mewn cyfnod mor gyffrous!

Mae’r Ganolfan wedi ei sefydlu’n gadarn iawn ac yn darparu cefnogaeth addysgol a bugeiliol o’r radd flaenaf i’r 50 disgybl 11-19mlwydd oed sydd ag anghenion addysgol dwys neu anghenion ym maes awtistiaeth. Yn benodol dyma Ganolfan fywiog, fyrlymus, llawen a chroesawgar sydd wrth galon cymuned Glantaf. Mae naws greadigol, ofalgar a chynhaliol yr adran yn pefrio drwy ei gweithgaredd, a’i disgyblion yn mwynhau trawsdoriad eang o brofiadau unigol a chyfoethog ochr yn ochr â disgyblion eraill Glantaf.

Rydym yn eithriadol o ffodus o’n tîm ardderchog a phrofiadol iawn o athrawon a chynorthwy-wyr sy’n gweithio’n gydlynus a chefnogol i gynnal anghenion unigol pob un disgybl. Un nodwedd arbennig o’r twf a’r datblygiad diweddar yw’r cyfleoedd a’r datblygiad i staff yr ysgol, ac edrychwn ymlaen yn eiddgar er mwyn datblygu staff ymhellach i ddelio’n llwyddiannus a thaith a thwf disgyblion yr ysgol i’r dyfodol. Yn fwy na dim, byddwch yn arweinydd ar dîm o unigolion llawn cymhelliant, hwyliog a brwdfrydig, sy’n cyd-weithio’n rhwydd ac effeithiol er lles a datblygiad unigolion arbennig iawn.

Edrychwn ymlaen i fuddsoddiad sylweddol i’r Ganolfan mewn adeilad a chyfleusterau ardderchog 21ain Ganrif dros y flwyddyn nesaf. Bydd hyn yn trawsnewid darpariaeth cyfredol y Ganolfan a byddwn yn croesawu eich gweledigaeth a’ch cyfraniad yn nyddiau sefydlu ein canolfan newydd arloesol yma yng Nglantaf Ymhellach, mae ein Canolfan Awtistiaeth ochr yn ochr a’r Ganolfan yn darparu cymorth a chefnogaeth arbenigol i’n disgyblion.

Rhan allweddol o’r rôl yw cyfathrebu gydag ein rhieni, ein darpar rhieni ac eraill i sicrhau bod darpariaeth yn holistig ac yn ateb gofynion unigryw pob plentyn. Rydym yn falch iawn o’r berthynas agored, gynhaliol a chynnes sy’n bodoli rhyngddom a’n teuluoedd a bydai cryfhau a datblygu’r elfen werthfawr hon yn elfen allweddol o’r swydd.

Edrychwn am unigolyn gweithgar, cadarnhaol a phrofiadol i gamu i rôl allweddol hon. Byddwn yn awyddus iawn i gynnal a chynnig hyfforddiant i unigolion addas ac i gynnig datblygiad gyrfa arbennig i unigolion sydd âg awydd pendant i wneud gwahaniaeth i fywyd plant a phobl ifanc. Gwahoddwn geisiadau gan ymarferwyr ac arweinwyr o fewn ADY sydd â thrawsdoriad eang o brofiadau o fewn y maes neu o arwain mewn cyfnodau allweddol gwahanol (cynradd / uwchradd neu pob oed) gan y gallai hyn weddu i’r dim i anghenion presennol ein disgyblion. Yn anad dim, byddwch yn camu i rôl ganolog a phwysig ym mywydau ein disgyblion arbennig ac unigryw yng Nghanolfan Adnoddau Arbennig Glantaf, ac edrychwn ymlaen â brwdfrydedd i glywed eich syniadau a’ch gweledigaeth ar gyfer ein cyfnod nesaf.

Byddwch yn gweithio’n strategol a chlos gyda Arweinydd y Ganolfan, y Tîm Arwain a’r Corff Llywodraethol a hynny er mwyn sicrhau gofal, addysg a darpariaeth effeithiol. Byddwch yn gweithio’n agos ac yn derbyn cefnogaeth gan Arweinydd y Ganolfan ynghyd a Swyddogion Arbenigol y sir ym meysydd amrywiol ADY ac anghenion dwys. Yn hyn o beth, mae delio yn effeithiol a chadarnhaol gyda phartneriaid allweddol yn rhan bwysig o’r rôl.

Gan fod Ysgol Gyfun Gymraeg Glantaf yn ymrwymedig i les a diogelwch pob plentyn, mae’r swydd hon yn amodol ar wiriad manwl diogelu plant a dau eirda llwyddiannus. Os hoffech fwy o fanylion am y swydd hon ac am sgwrs anffurfiol cysylltwch â’r Pennaeth Gweithredol, Mr Matthew Evans yn yr ysgol.

Proses Ymgeisio

Gellid ymgeisio am y swydd hon drwy ffurflen a llythyr cais yn mynegi diddordeb am ymgymryd â’r swydd. Gellir sôn am brofiad perthnasol ar gyfer y swydd hon, ynghŷd â’r weledigaeth ar sut y gellir cyfrannu ymhellach yng nghyd-destun cymuned yr ysgol.

Dyddiad Cau: Hanner Dydd, 28 Ionawr 2026

Dyddiad dechrau’r swydd: 1 Medi 2026