Uwch-gynorthwyydd Lles ac Arweinydd Ystafell Keri ac Hafan Roger Boore

Swydd: Uwch-gynorthwyydd Lles ac Arweinydd Ystafell Keri ac Hafan Roger Boore  

(Gradd 6: 39 wythnos / 35 awr)

Mae’r ysgol yn awyddus i benodi unigolyn brwdfrydig ac effeithol i swydd Arweinydd Ystafell Keri ac Hafan Roger Boore yn Ysgol Gyfun Gymraeg Glantaf. Dyma ddwy ystafell sydd yn darparu gofal a chynhaliaeth lles i ddisgyblion sydd ag anghenion ymddygiadol, emosiynol a chymdeithasol. Bydd disgwyl i’r ymgeisydd llwyddiannus fod â’r profiad a’r dealltwriaeth i ymateb yn hyblyg i ymholiadau gwahanol yn ymdrin a gofal bugeiliol, diogelu a phresenoldeb. Mae’r swydd yn gofyn am sgiliau rhyng-bersonol da iawn i allu delio gydag amrywiaeth o sefyllfaoedd, asiantaethau a phartneriaid allanol. Craidd y swydd yw arwain a rheoli tim o gymorthyddion i gynnal perthnasoedd cadarnhaol gyda disgyblion. Byddwch yn gweithio’n agos a chydlynus gyda thim bugeiliol yr ysgol, gyda’r Tim Arwain, CADY, Tim Cynnydd a Lles ac Arweinwyr Adran i gefnogi darpariaeth gydlynus a holistig i ddisgyblion.  

Bydd disgwyl i’r ymgeisydd llwyddiannus fod â sgiliau gweinyddol ardderchog, a’r gallu i ddelio yn sensitif a chyfrinachol mewn sefyllfaoedd personol neu gymleth, yn aml gydag unigolion â theuluoedd sy’n delio ac argyfyngau a thrallod. Mae’r gallu i weithio yn effeithiol fel rhan o dîm estynedig yn allweddol i’r rôl gan weithio’n agos iawn gyda’r CADY ynghyd â staff eraill ar draws yr ysgol. Bydd angen sgiliau trefnu a rheoli gweinyddiaeth effeithiol er mwyn sicrhau fod materion yn cael sylw mewn da bryd a bod blaenoriaethau yn derbyn sylw teilwng mewn cyfyngder amser penodol, ynghyd a chofnodi data yn fanwl gywir. Byddwch yn gyfrifol o ddydd i ddydd am arwain a rheoli tim estynedig o gymorthyddion a chydlynu’r ddarpariaeth i sicrhau bod cymorth parod ac effeithiol i grwpiau targed ac unigolion ym maes eang cynhaliaeth bugeiliol gan gynnwys ymyraethau gwelliant, fel ELSA, Thrive ac ati. Byddwch yn tracio ymddygiad, agweddau at ddysgu a chynnydd disgyblion yn glos gydag AC&Ll drwy gynnal systemau effeithiol i dracio cynnydd, ymddygiad ac arwain ymyraethau.  

Byddwch yn delio a rhychwant eang iawn o rhanddeiliaid ar draws cymuned yr ysgol gan sicrhau cyfathrebu cywir, trefniadaeth effeithiol a llyfn. Craidd eich gwaith fydd arwain tim o staff i sicrhau dilyniant, gweithredu effeithiol, rhaeadru gwybodaeth ac i gysoni polisiau a strategaethau yn gydlynus ac effeithiol. 

Byddwch yn frwd i arloesi o fewn maes ADY gan sicrhau gofal caredig, gynhwysol a chefnogol o ddisgyblion tra’n gadarn i’r egwyddor mae mewn ysgolion mae plant a phobl ifanc yn ffynnu.    

Byddwch yn cynorthwyo i sicrhau gweithredu systemau cadarn yn unol a gofynion stadudol a chyfreithiol o fewn y ddeddf ADY. Byddwch hefyd yn gallu camu i rolau cynrychiolaeth yr ysgol mewn cyfarfodydd diogelu yn achlysurol.    

Os hoffech fwy o fanylion am y swydd hon ac am sgwrs anffurfiol cysylltwch â’r Pennaeth Gweithredol, Mr Matthew Evans.

Dyddiad dechrau’r swydd 1 Medi 2026