Pennaeth Adran Wyddoniaeth Ysgol Gyfun Gwyr - CAD 1B

Arwain adran lwyddiannus. Adeiladu ar gryfder. Llywio’r camau nesaf.

Yn dilyn dyrchafiad ein Pennaeth Gwyddoniaeth presennol i Dîm Arwain yr ysgol, mae cyfle arbennig wedi codi i arweinydd uchelgeisiol ymuno ag Ysgol Gyfun Gŵyr a chymryd yr awenau ar faes sydd eisoes yn gryf a llwyddiannus.  Nid cyfle i ddechrau o’r newydd yw hwn. Mae’n gyfle i adeiladu ar sylfeini cadarn, arwain tîm ymroddedig a llywio camau nesaf datblygiad Gwyddoniaeth yn yr ysgol.  Rydym yn chwilio am athro neu athrawes Gwyddoniaeth ragorol sydd â’r weledigaeth, yr egni a’r uchelgais i arwain gyda hyder, datblygu eraill a sicrhau bod pob dysgwr yn cael ei herio a’i ysbrydoli i gyflawni hyd eithaf ei allu.

Adran lwyddiannus ac uchelgeisiol

Mae Gwyddoniaeth yn faes cryf a phwysig yn Ysgol Gyfun Gŵyr. Mae safonau academaidd uchel, addysgu effeithiol a chydweithio agos rhwng staff yn ganolog i waith yr adran.  Mae ein canlyniadau diweddar yn adlewyrchu’r cryfder hwn. Yn haf 2026, enillodd 60% o ddysgwyr Cemeg Safon Uwch raddau A - A*, a 50% o ddysgwyr Bioleg Safon Uwch raddau A - A*. Ar lefel TGAU, cyflawnodd 81% o ddysgwyr raddau A - C mewn Gwyddoniaeth*.  Ond nid cynnal yr hyn sydd eisoes wedi ei gyflawni yn unig yw ein huchelgais.  Rydym am i’r Pennaeth Gwyddoniaeth nesaf adeiladu ar y llwyddiant hwn, dod â syniadau ac egni newydd i’r maes a gweithio gyda staff i bennu cyfeiriad clir a chyffrous ar gyfer y blynyddoedd nesaf.

Cyfle i arwain a dylanwadu

Bydd y Pennaeth Gwyddoniaeth yn cael cyfle gwirioneddol i wneud gwahaniaeth.  Byddwch yn arwain datblygiad y cwricwlwm a’r ddarpariaeth ar draws yr ysgol, yn hyrwyddo addysgu a dysgu o’r safon uchaf, yn defnyddio tystiolaeth a data yn ddeallus i godi safonau, ac yn cefnogi a datblygu cydweithwyr i ffynnu yn eu gwaith.  Rydym am benodi rhywun sydd â disgwyliadau uchel ohono’i hun ac o eraill, ond sydd hefyd yn deall mai trwy gydweithio, meithrin pobl a chreu ymdeimlad cyffredin o bwrpas y daw llwyddiant cynaliadwy.  Byddwch yn cael y rhyddid a’r gefnogaeth i gyfrannu eich syniadau eich hun, herio’n adeiladol a helpu i lunio dyfodol Gwyddoniaeth yn Ysgol Gyfun Gŵyr.

Ai chi yw’r arweinydd rydym yn chwilio amdano?

Efallai eich bod eisoes yn Bennaeth Adran llwyddiannus ac yn chwilio am her newydd. Efallai eich bod yn ail mewn adran, yn arweinydd pwnc neu’n athro neu athrawes profiadol sy’n barod i gymryd y cam nesaf mewn arweinyddiaeth.

Beth bynnag yw eich rôl bresennol, rydym yn chwilio am rywun sy’n:

• ymarferwr dosbarth rhagorol ac yn angerddol dros Wyddoniaeth;
• meddu ar ddisgwyliadau academaidd uchel ar gyfer pob dysgwr;
• gallu ysbrydoli, cefnogi a datblygu eraill;
• meddwl yn strategol ac yn barod i gymryd cyfrifoldeb;
• gwerthfawrogi cydweithio a chyfrannu at ddiwylliant proffesiynol cadarnhaol;
• awyddus i wneud cyfraniad ehangach at arweinyddiaeth a datblygiad yr ysgol.

Y cam nesaf yn eich gyrfa?

Mae dyrchafiad deiliad presennol y swydd i Dîm Arwain yr ysgol yn adlewyrchu ein hymrwymiad i ddatblygu talent, meithrin arweinyddiaeth a rhoi cyfleoedd i bobl dyfu’n broffesiynol.  I’r unigolyn cywir, gall swydd Pennaeth Gwyddoniaeth yn Ysgol Gyfun Gŵyr fod yn llawer mwy na swydd newydd. Gall fod yn gyfle i ddatblygu fel arweinydd, cael dylanwad gwirioneddol a gwneud cyfraniad sylweddol at ddyfodol ysgol uchelgeisiol.  Os ydych yn arweinydd Gwyddoniaeth talentog sydd am adeiladu ar lwyddiant, datblygu tîm a gadael eich marc ar faes sydd â sylfeini cryf iawn eisoes, hoffem glywed gennych.  Croesawn yn gynnes ymholiadau anffurfiol gan ddarpar ymgeiswyr. Os hoffech wybod mwy am y swydd, rydym yn eich gwahodd i ymweld â’r ysgol neu i gael sgwrs anffurfiol gyda’r Pennaeth cyn cyflwyno cais.