Anogwr Dysgu Chweched Dosbarth
(cytundeb blwyddyn yn y lle cyntaf)
Gradd 5 p11-19 £28,142 -£32,061 pro rata
(pro rata 32.5 awr yr wythnos / 41 wythnos)
Mae’r ysgol yn awyddus i benodi unigolyn brwdfrydig i swydd llawn amser Anogwr Dysgu o fewn tim cynnydd a lles ein Chweched Dosbarth. Dyma gyfle arbennig i weithio gyda’n pobl ifanc i’w cynnal, eu cynghori a’u harwain i ymgartrefu o fewn y Chweched ac i dyfu’n arweinwyr cadarn o fewn cymuned yr ysgol. Prif nod eich swydd yn syml, fydd cefnogi disgyblion Glantaf i aros o fewn addysg cyfrwng Cymraeg ar gyfer eu hastudiaeth ôl16 ac i’w cefnogi ymhellach drwy gyfnod fel myfyrwyr hŷn o fewn cymuned yr ysgol.
Gan fod dalgylch Glantaf yn adlewyrchiad eang o gymunedau’r ddinas, rydym yn frwd i adeiladu ymhellach i sicrhau bod astudio o fewn y Chweched yn gynrychiolaeth llawn o gyfoeth ac amrywiaeth ein dalgylch. Rydym am sicrhau bod safonau uchel ein darpariaeth yn ymestyn i sicrhau bod ein Chweched Dosbarth yn gynhwysol, perthnasol a Chymreig i fyfyrwyr Glantaf i’r dyfodol. Byddwch yn gweithio o fewn tim o staff sy’n ymrwymiedig i sicrhau ystod eang o gyrsiau a darpariaeth er mwyn sicrhau bod disgyblion a dewis atyniadol a chyffrous i aros o fewn addysg cyfrwng Cymraeg i lwybrau dysgu ôl16.
Byddwch yn cynorthwyo myfyrwyr i sicrhau fod eu mynediad at addysg yn rhwydd ac yn llifo yn fwy hwylus gyda chymorth oedolyn ac arweiniad unigol. Mae rhai myfyrwyr â heriau astudio annibynnol a threfnu gwaith, eraill angen cyngor o ran dewis trywydd a llwybr gyrfaol, tra bod rhai yn elwa o gymorth ymarferol neu emosiynol. Wrth i’n pobl ifanc wynebu heriau sylweddol, edrychwn am unigolyn sy’n medru ysbrydoli, cymell a chefnogi unigolion i oresgyn rhwystrau er mwyn datblygu’n ddinasyddion aeddfed a dysgwyr annibynnol.
Rhan allweddol o’ch gwaith fydd pontio’r cyfnod rhwng astudio TGAU yn Blwyddyn 11 a gofynion gwahanol astudio yn y Chweched. Byddwch yn medru estyn cymorth a chynhaliaeth i ddisgyblion yn Bl11 gyda dewis pynciau, gyda her adolygu a gwaith paratoi at arholiadau a gan eu hanwytho wedyn o fewn Chweched Glantaf.
Byddwch yn gweithio yn uniongyrchol gyda myfyrwyr ac yn agos gyda Arweinwyr Cynnydd a Lles y Chweched Dosbarth. Byddwch yn ddolen gyswllt bwysig rhwng tiwtoriaid personol, athrawon pwnc o fewn yr adrannau a gyda chartrefi y myfyrwyr eu hunain. Byddwch yn drefnus ac yn gallu gweithredu systemau gweinyddol yn hwylus gyda cheisiadau Prifysgol, sysemau tracio cynnydd a monitor phresenoldeb. Byddwch yn angerddol dros sicrhau’r gynhaliaeth orau i ddisgyblion, yn frwd dros y Gymraeg ac yn fodel rôl allweddol i fyfyrwyr wrth iddynt fwynhau bywyd yn Nglantaf.
Wrth ymuno â ni, byddwch yn ymuno â thim profiadol estynedig sy’n gweithio yn gydlynus i gefnogi ein disgyblion o fewn cymuned Glantaf. Byddwch yn gwerthfawrogi gweithio’n agos gyda myfyrwyr sydd yn astudio amrywiaeth eang o bynciau o fewn y cwricwlwm, ac sydd ar adegau angen cymorth gyda sgiliau astudio, rheoli amser neu weithio’n annibynnol.
Bydd disgwyl i’r ymgeiswyr llwyddiannus gael brwdfrydedd ac awydd clir i weithio gyda pobl ifanc er mwyn gwneud gwahaniaeth i’w datblygiad a’u cynnydd o fewn yr ysgol. Byddwn yn edrych am unigolion dynamig sydd yn gweithio yn dda fel rhan o dîm ac sydd â’r weledigaeth fod addysg yn gallu gwneud gwahaniaeth i fywyd a chyfleoedd pobl ifanc. Mae angen brwdfrydedd a gweledigaeth i arwain pobl ifanc ac edrychwn am unigolyn sydd a’r ddawn i argyhoeddi a chymell unigolion i roi o’u gorau ac i ddyfalbarhau er mwyn llwyddo.
Byddwn yn hapus iawn i ddarparu hyfforddiant a chynhaliaeth i berson sy’n chwilio am ddatblygu gyrfa ym myd addysg. Yn sicr, mae’r swydd a’r ysgol yn cynnig datblygiad gyrfa cyffrous ac unigryw. Edrychwn am unigolion fyddai’n frwd i gyfrannu yn llawn at fywyd allgyrsiol a chyfoethog yr ysgol.
Os hoffech fwy o fanylion am y swyddi rhain neu am sgwrs anffurfiol cysylltwch â’r Pennaeth Gweithredol, Mr Matthew Evans.
Proses Ymgeisio
Gellid ymgeisio am y swyddi rhain drwy ffurflen a llythyr cais yn mynegi diddordeb am ymgymryd a’r swydd. Gellir sôn am brofiad perthnasol ar gyfer y swydd ynghŷd â’r weledigaeth ar sut y gellir cyfrannu ymhellach yng nghyd destun cymuned yr ysgol.
Dyddiad Cau: Hanner dydd, Dydd Mercher 13 Awst 2026
Dyddiad dechrau y swydd: Medi 2026
Mae Ysgol Gyfun Gymraeg Glantaf yn ymrwymedig i ddiogelu a hyrwyddo lles plant, pobl ifanc ac oedolion agored i newid, ac mae’n disgwyl i’r holl staff a gwirfoddolwyr ddeall a rhannu’r ymrwymiad hwn. Mae ymrwymiad cyffredin gennym i ddatblygu diwylliant o barch, lle na chaiff gwahaniaethu ei oddef. Rydym yn croesawu pob cais, gan gynnwys ceisiadau gan bobl o grwpiau sydd wedi’u tangynrychioli ar sail ethnigrwydd, rhywedd, trawsrywedd, oedran, anabledd, cyfeiriadedd rhywiol neu grefydd.