Sefydlwyd Ysgol y Frenni yn 2006. Cyn hynny roedd ysgolion cynradd yng Nghrymych, Blaenffos a Hermon, ond unwyd yr ysgolion a ffurfiwyd Ysgol y Frenni. Sefydlwyd Ysgol y Preseli fel Ysgol Gyfun Ddwyieithog yn 1991 ac mae ei llwyddiant wedi gweld twf sylweddol yn niferoedd y disgyblion sy’n derbyn Addysg Gymraeg.

Mae’r ysgol yn hyrwyddo addysg cyfrwng Cymraeg o’r radd flaenaf, safonau uchel a deilliannau rhagorol. Yn ogystal â safonau academaidd rhagorol mae’r ysgol hefyd yn cynnig ystod eang o weithgareddau allgyrsiol sy’n cynnwys perfformiadau theatrig, chwaraeon, cerddoriaeth, ymweliadau, clybiau a chymdeithasau.

Mae Ysgol Bro Preseli yn barod i ymateb a gweithredu ar flaenoriaethau cenedlaethol ar gyfer gwella safonau ac ansawdd yr addysgu a’r dysgu. Mae’r ysgol yn ysgol arweiniol gyda’r Athrofa, Prifysgol y Drindod Dewi Sant ar gyfer addysg gychwynnol athrawon ac yn ysgol arloesol ar gyfer dysgu proffesiynol.

Fel ysgol gymunedol mae ein cyfleusterau yn cael eu defnyddio’n helaeth gan y gymuned yn ystod y dydd a chyda’r nos a gwna’r ysgol ddefnydd effeithiol o adnoddau’r gymuned fel cyfrwng i gyfoethogi addysg y disgyblion. Ar y campws, mae lloeren cyfrwng Cymraeg Ysgol Portfield wedi’i lleoli ynghyd â Chanolfan Iaith, Canolfan Ddysgu Gymunedol sy’n cynnwys Gwasanaeth Cymraeg i Oedolion, Theatr y Gromlech, llyfrgell gyhoeddus, pwll nofio, canolfan hamdden, cae pob tywydd, meithrinfa gofal plant dydd a chylch meithrin.

Ein Gwerthoedd

Cynhelir safonau disgyblaeth uchel yn yr ysgol sy’n seiliedig ar werthoedd cytûn. Adlewyrchir hyn yn ymddangosiad ac ymddygiad disgyblion. Credwn mai’r ffordd fwyaf effeithiol o ddisgyblu yw drwy feithrin hunan ddisgyblaeth ac agwedd gyfrifol ymhlith y disgyblion. Ein gwerthoedd allweddol yw:

Caredigrwydd

Hyrwyddo ethos bositif ac awyrgylch gyfeillgar drwy ddatblygu’r gallu i ymddiried yn ein gilydd.

Cyfrifoldeb

Meithrin cyfrifoldeb dros ein lles corfforol, emosiynol ac ysbrydol, ein haddysg a’n diwylliant.

Cymreictod

Dathlu’n Cymreictod ac ymfalchϊo yn ein hamlieithrwydd.

Gan fod yr ysgol yn ysgol swyddogol ddwyieithog disgwylir i rieni a disgyblion fod yn frwd dros addysg trwy gyfrwng y Gymraeg.

Disgwyliwn i’r disgyblion ddangos parch a balchder yn yr iaith Gymraeg drwy ddefnyddio’r iaith yn reolaidd tu mewn a thu allan i’r dosbarth.

Ceisiwn ennyn balchder yn y disgyblion tuag at iaith, diwylliant, hanes a threftadaeth Cymru.

Diben y Ganolfan Iaith yw darparu cwrs dysgu Cymraeg dwys i alluogi plant i gyrraedd lefel rhuglder y mae ei hangen i drosglwyddo i addysg mewn ysgol cyfrwng Cymraeg. Agorwyd y Ganolfan ym Mis Medi 1985, er mwyn cynorthwyo newydd ddyfodiaid di-Gymraeg yr ardal i ymgynefino gyda’r Gymraeg yn gyflym.

Cefngir yr hwyrddyfodiad â chwrs rhan-amser sy’n para dwy flynedd.

Yn ystod y flwyddyn gyntaf mae hwyrddyfodiaid yn dilyn cwrs deuddydd i hwyrddyfodiaid. Mae’r cwrs yma’n cynnwys ffocws cryf ar ddatblygu sgiliau llafaredd disgyblion gyda phatrymau iaith a geirfa sy’n seiliedig ar ymarfer yn yr ystafell ddosbarth ac iaith fynegiannol er mwyn rhoi cymorth i integreiddio disgyblion yn naturiol i mewn i’w hysgolion. Mae’r addysgu’n thematig mewn grŵp bach o ddim mwy nag 14 ac mae staff yn defnyddio ystod eang o ddulliau addysgu i gefnogi datblygiad sgiliau llafaredd, darllen ac ysgrifennu disgyblion.

Dilynwch ni ar y Cyfryngau Cymdeithasol