Athro Pontio Cynradd Uwchradd as safle Bro Dur

Swydd: Athro

Graddfa Cyflog Athrawon

Mae’r ysgol yn awyddus i benodi Athro / Athrawes Cynradd profiadol neu athro sydd wedi bod allan o’r proffesiwn, sydd â diddordeb mewn trosglwyddo i'r sector uwchradd cyfrwng Cymraeg fel rhan o gynllun pontio Llywodraeth Cymru. Bwriad y cynllun yw cynyddu nifer yr athrawon cyfrwng Cymraeg o fewn y sector uwchradd. Fel rhan o’r cynllun byddwch yn ymuno â thîm addysgu Ysgol Gymraeg Bro Dur am flwyddyn gan dderbyn cefnogaeth wrth addysgu o fewn y sector uwchradd. Gwahoddwn geisiadau gan athrawon brwdfrydig a blaengar o’r sector cynradd sydd â diddordeb mewn ehangu eu profiadau mewn ysgol uwchradd. Yn ogystal, croesewir ceisiadau gan athrawon cynradd ac uwchradd sydd am ddychwelyd i ddysgu yng Nghymru neu athrawon sydd am ddychwelyd i'r proffesiwn.

Mae Ysgol Gymraeg Bro Dur yn ysgol uwchradd cyfrwng Cymraeg i ddisgyblion 11–16 oed, wedi’i lleoli yn agos i Draeth Melyn Port Talbot—dim ond pum munud o’r draffordd. Wedi’i lleoli mewn adeiladau modern a phwrpasol newydd sbon, mae’r ysgol yn cynnig amgylchedd dysgu rhagorol i gymuned ysgol fechan, glos a chyfeillgar o tua 500 o ddisgyblion, gyda chynnydd sylweddol wedi’i ragweld dros y tair blynedd nesaf. Mae ein tîm o staff ifanc a brwdfrydig yn rhannu ymrwymiad cryf i ddatblygiad proffesiynol, gyda’r egwyddorion Ysgol Fel Sefydliad Dysgu yn greiddiol i’n gweledigaeth ac yn sail i’n diwylliant o gydweithio, arloesi ac uchelgais.

Mae’r cynllun hwn yn cynnig blwyddyn o gyflogaeth yn Ysgol Gymraeg Bro Dur i arsylwi ac addysgu o fewn pwnc neu bynciau arbenigol. Mewn cydweithrediad â Phrifysgol Cymru y Drindod Dewi Sant neu Met Caerdydd byddwch yn derbyn cefnogaeth i drosglwyddo’n llwyddiannus i addysgu yn y sector uwchradd. Bydd ffocws penodol ar yr agweddau canlynol:

• Cynllunio gwersi

• Asesu, marcio ac adborth

• Rheolaeth ddosbarth

• Datblygu dycnwch

• Sgiliau ieithyddol (yn ddibynnol ar anghenion yr unigolyn).

Bydd gennych Gefnogwr Proffesiynol o fewn yr ysgol a fydd yn cynnal deialog broffesiynol rheolaidd er mwyn eich cefnogi. Bydd eich amserlen yn cynnig cyfnodau estynedig i gynllunio, ymchwilio ac arsylwi yn ogystal ag amserlen ddysgu.

Edrychwn am unigolion brwdfrydig sydd â gweledigaeth gadarn dros ddatblygu disgyblion yn ddysgwyr annibynnol, hyderus a llwyddiannus. Mae’r cyfle hwn yn agored i geisiadau llawn amser neu ran amser.

Mae’r cynllun hwn wedi’i gefnogi gan Lywodraeth Cymru ac ar gael i ymgeiswyr ar draws Cymru.

Proses ymgeisio:

Nodwch os gwelwch yn dda NI DDYLID ymgeisio i'r ysgol yn uniongyrchol. Dylech ymgeisio drwy lenwi’r ffurflen gais sydd wedi’i atodi i’r hysbyseb hon gan nodi eich dymuniad o ran lleoliad. Anfonwch eich cais gorffenedig i Lywodraeth Cymru (gweler ffurflen gais am fanylion) erbyn y dyddiad cau, sef 23:59 dydd Sul, 22 Chwefror 2026.

Bydd cyfweliadau yn cael eu cynnal yn yr ysgolion partner rhwng 9fed a'r 13ydd Mawrth..

Mae mwy o fanylion am y cyfle hwn ar Cynllun pontio cynradd i uwchradd cyfrwng Cymraeg - Hwb neu os hoffech drefnu ymweliad â’r ysgol neu sgwrs anffurfiol cysylltwch â’r Pennaeth Mrs Laurel Davies neu Miss Sioned Jones.